𝐌𝐥𝐢𝐦𝐢 𝐖𝐚𝐳𝐚𝐤𝐚 𝟏𝟗 𝐀𝐤𝐮𝐲𝐞𝐦𝐛𝐞𝐤𝐞𝐳𝐞𝐫𝐚 𝐏𝐡𝐢𝐧𝐝𝐮 𝐋𝐚𝐥𝐢𝐤𝐮𝐥𝐮 𝐧𝐝𝐢 𝐓𝐡𝐚𝐧𝐝𝐢𝐳𝐨 𝐥𝐚 𝐍𝐄𝐄𝐅 𝐤𝐮 𝐂𝐡𝐢𝐫𝐚𝐝𝐳𝐮𝐥𝐮

Wolemba Andrew Tembo

Chancy Chitsa wa zaka 19 ochokera m’mudzi mwa Mchochera, mfumu yayikulu Mpama m’boma la Chiradzulu, membala wa Matangadza Irrigation Scheme yomwe ili ndi alimi 52 watukuka ndi ngongole ya ulimi wamthilira yochokera ku National Economic Empowerment Fund (NEEF) Limited.

Mlimi wachinyamatayu ndi m’modzi mwa alimi ochuluka omwe akupindula ndi ngongole ya zipangizo za ulimi wa mthilira yomwe bungwe la NEEF likupeleka ndi cholinga chobweretsa chakudya komanso kulimbikitsa achinyamata m’Malawi muno

.

“Ndinawona NEEF ngati mwayi wodzitukula, ndichifukwa chake ndinaganiza zolima anyezi pa munda wa ekala imodzi, chifukwa ndimadziwa kuti ndi mbewu yomwe imasowa pamsika ndipo ndipanga ndalama zambiri,” anatero Chitsa.

M’mawu ake, mkulu oyang’anira za kagawidwe kangongole ku NEEF,  bambo Whyghtone Mweta, anayamikira chidwi cha Chitsa.

“Ndili wokondwa kuti mnyamata wamng’ono ngati uyu akuchita ulimi wotere ndipo akuganiza zodzitukula ndi masomphenya a NEEF,” adatero a Mweta,  paulendo wowunikira m’mene ulimi wa mthilira ukuyendera ku mwera kwa Malawi.

Ngongole yi,  ikupereka zipangizo za ulimi wamthilira monga fetereza, mbewu ndi mapampu oyendera mphamvu ya dzuwa kwa alimi kuti apeze phindu lochuluka.

Chiyambireni pologalamu ya ulimi wa mthilira chaka chino pa 14 April, 2025, bungweli lapereke ngongole zoposera MK26 biliyoni kwa alimi 64,243 m’dziko lino.

Pulogalamuyi ikuthandizira pang’onopang’ono ntchito za dziko zomwe cholinga chake ndi kuchulukitsa chakudya mdziko muno.